لەکاتی داخستنی بازاڕ بەهای دۆلار بەشێوەیەکی بەرچاو بەرزبوەوە

جەبار گۆڕان، وتەبێژی بازاڕی ئاڵوگۆڕی دراو لە شاری سلێمانی ئێوارەی ئەمڕۆ سێشەممە بە خەندان-ی راگەیاند، “کارتی ئەلیکترۆنی کە لەماوەی رابردودا بۆ دابەزاندنی بەهای دۆلار بەرامبەر بە دینار بەکارهێنرا هۆکارێکی باش بو، هەتاوەکو مامەڵەکردن پێوەی هاوشێوەی جارانی لێنەکرێتەوە نرخی دۆلار دانابەزێت، پێشتر رۆژانە تاوەکو هەزار و 300 دۆلاری پێڕادەکێشرا بەڵام ئێستا بۆ 300 دۆلار رۆژانە کەمکراوەتەوە و بەشێکیشیان سنوردارکراوە و هەندێکیان بەتەواوەتی وەستێنراوە”.

ئەمڕۆ بانکی ناوەندی 60 ملیۆن دۆلاری تەنها بە کاش فرۆشتوەو ئەو پارەیە بە عەمەلی نایەتە ناو بازاڕ

ئاماژەی بەوەشکرد، ئەمڕۆ بانکی ناوەندی 60 ملیۆن دۆلاری تەنها بە کاش فرۆشتوە ئەگەر ئەو پارەیە بە عەمەلی بێتە ناو بازاڕ و پڕۆسەی ئاڵوگۆڕی دراوەوە ئەوا بەهای دۆلار دادەبەزێنێت، بەڵام لە راستیدا ئەو پارەیە نایەتە بازاڕەوە، ئەوەش “بەهۆی قۆرخکاری و گەندەڵییەوەیە”.

بەشێکی زۆری خەڵک و بازرگانان دۆلارەکەیان فرۆشت و کردیان بەدینار، ئێستا دەیکڕنەوە

وتەبێژی ئاڵوگۆڕی دراو لە شاری سلێمانی باسی لەوەشکرد، لەماوەی رابردودا بەرپرسانی حکومەتی عێراق و بانکی ناوەندی لەماوەی رابردودا دڵنیایی تەواویاندا کە دۆلار دادەبەزێت و ئەوکاتەی 100 دۆلار گەیشتە 143 هەزار دینار بەشێکی زۆری خەڵک و بازرگانان دۆلارەکەیان فرۆشت و کردیان بەدینار، ئێستا دۆلار رو لە بەرزبونەوەیە و بەشێک لە خەڵک و بازرگانان دۆلار دەکڕنەوە و خواستێکی زۆری لەسەرە.

رێگەی خرا بۆ دابەزاندنی بەهای دۆلار چالاککردنەوەی تەواوی ماستەرکارتەکان و ئەو بەربەستانەی بەردەمی لاببرێت

جەبار گۆڕان پێیوایە، رێگەی خرا بۆ دابەزاندنی بەهای دۆلار چالاککردنەوەی تەواوی ماستەرکارتەکان و ئەو بەربەستانەی بەردەمی لاببرێت، جاران رۆژانە زیاتر لە 60 ملیۆن دۆلار لە دەرەوە لە رێگەی ئەو کارتانەوە دەکڕدرا و دەگوازرایەوە عێراق و هەرێمی کوردستان ئەوەش وایکردبو دۆلار زۆر خێرا دابەزێت، بەڵام ئێستا بەبیانوی سپیکردنەوەی پارە کارتەکان وەستێنراون یان مامەڵەکردن پێوەی سنوردارکراوە، ئەوە جگە لەوەی بانکەکانیش عمولەیان بەشێوەیەکی بەرچاو بەرزکردوەتەوە.